Monday, June 27, 2011

Dili daw tanan matagak mahagbong

Ireprint nako ni gikan sa sa internet samtang nagkalingaw ug pang-utingkay. 

DILI TANAN MATAGAK MAHAGBONG
Adonis Gesta Durado

Pananglit mangalibang ang galupad nga panon
Sa langgam luyo sa libon nga panganod,
unsa kahay mahitabo ngadto sa ilang mga iti?
Motaguktok kaha kini og tibuok kung ugaling
Matungod sa atong atup? O mokalit og kahanaw,
Sama sa bulalakaw, mangapulpog sa dili pa
Makaabot sa gasawo tang mga kamot?

Di man tingali ang tanang matagak ba mahagbong;
Dili tanang mahulog adunay padulngan –
Nga ang mga butang nga nakabuhi sa atong kamot
(O natagak gikan sa wanang) adunay tugpahan.

Swerti lang tingali ang tawng gaparasyut
Kay mitugpa sa atup. Swerti lang ang nabugto
Nga tabanog kay nasangit sa poste sa iskina;
Ang nangapunggak nga mga bunga sa mangga
Ang taligsik ba ron sa uwan nga nasawod
Sa mga basiyong lata - ug kining tanan,
Gumikan pa niining balaod sa pisika.

Apan, diin man kuno minglagapak ang imong katawa
Dihang lanog mong gipalukso sa karaang atabay?
Hain tugpa ang mga ngalan, pulong nga nakasaknit?
(Kini, sama sa pangutana sa mga bata kung diin
Dad-a sa hangin - kung wa man gani lamya
Sa bakunawa - ang mga nakabuhi nilang balon.)
Ug kinsa say nasayod, nga ang nahiplos mong singsing
Nga milayat kaniadto sa lawod, kay hangtud karon,
Gapadayon lang gihapon sa iyang pagka-unlod?

Gani, buot kong hunahunaon karon, nga ang mga kalag
Niadtong managtratong gahikog sa pangpang,
Kay naungot ug galutaw lang gihapon sa wanang.